Die Melkprodusente-organisasie (MPO) het op Maandag 19 Julie aan MPO-personeel bekend gemaak dat vrugbare gesprekke met ’n nie-winsgewende maatskappy (NPO), Agri Voice, gevoer is. Die MPO sal as volwaardige lid by die NPO aansluit. Die eienaarskap van Agri Connect (PTY) Ltd en The Dairy Mail (Pty) Ltd sal oorgedra word aan Agri Voice wat hierdie entiteite vanaf 1 Augustus 2021 as lopende sake sal bestuur. Dr. Willem Pretorius, GP van Rheede van Oudtshoorn, en Thina Nodada is direkteure van Agri Voice.
Albert Loubser, bestuurder van die TV-kanaal Agri TV is baie bekend aan Agri Connect en die media- en uitgewersbedryf as sodanig, en sê namens die direkteure van Agri Voice dat die tydsberekening nie beter kon gewees het nie. Albei partye is dankbaar vir die proses wat die MPO in staat sal stel om nou op kernbesigheid te konsentreer, terwyl The Dairy Mail as die vlagskip-publikasie van die melkbedryf behou word. Die MPO sal ook toegang hê tot die aanlynvideo-platform van Agri TV wat die mediavoetspoor van die organisasie verder sal uitbrei.
Onderhandelinge oor die transaksie en voorwaardes is nog aan die gang, maar die Agri Connect- en The Dairy Mail-span het met Loubser en Pretorius vergader, en almal is steeds daartoe verbind om ’n ononderbroke volledige pakket media- en uitgewersdienste aan hul kliënte, die MPO, die Rooivleisprodusente-organisasie, die Nasionale Wolkwekersvereniging, Katoen Suid-Afrika en ander landbou-entiteite te lewer.
Fanie Ferreira
Waarnemende uitvoerende hoof, MPO
Published on Friday, 23rd July 2021 - 12:34
Recent Posts
disclaimer