MPO MOTIVEER DAT KITSKOSBESIGHEDE WEER BESIGHEID MOET KAN DOEN

MPO FLITS 2/8 APRIL 2020

Die MPO het op 7 April 2020 die oopmaak van kitskosbesighede via die Bedryfskamer van Agri SA gemotiveer. Die vertrekpunt was die verslapping van die spazawinkels en informele voedsel handelaars se COVID-19 regulasies en die ooreenstemming daarvan met kitskosbesighede. Die sakeprotokol vir hierdie besighede kan redelik maklik gedefinieer word om steeds die verspreiding van die COVID-19-virus teen te werk in samehang met die breë sosiale gedragsreëls wat reeds geld. Daarmee saam het die Suid-Afrikaanse publiek oor die afgelope tydperk van inperking reeds gewoond geraak aan die sosiale gedragsreëls en kan dit net so toegepas word in die kitskosbesighede. Ter verdere motivering is daarop gewys dat dié tipe ondernemings nie alkohol verkoop nie en dat dit beperk kan word tot slegs wegneemetes. Agri SA sal die voorstel en motivering dringend per brief aan die Minister van Landbou rig.