ARBEIDSWETGEWING: DOEN DIT REG deur Christo Bester

Suid-Afrika se sakeomgewing is hoogs gereguleer ten opsigte van arbeidswetgewing.  Dit plaas bykomende druk op werkgewers, spesifiek wat betref die plaas se winsgewendheid en volhoubaarheid. Deur proaktief te wees en ’n vaartbelynde arbeidsomgewing daar te stel kan die werkgewer dispute in die werkplek beperk.

KONTROLELYS VIR WERKGEWERS

ten opsigte van die vereistes wat arbeidswetgewing stel:

• Registrasie
• Is jy geregistreer by die Vergoedingskommissaris?
• Is jy geregistreer by die Werkloosheidsversekeringsfonds?
• Dienskontrakte
• Het elke werknemer ’n dienskontrak wat aan toepaslike arbeidswetgewing voldoen?

Neem kennis dat die dienskontrak die heel belangrikste dokument in die werkplek is en die grondslag vorm van die diensverhouding.

• Gebruik jy vaste-termyn- of permanente dienskontrakte in ooreenstemming met wetgewing?

Neem kennis dat dit onwettig is om permanente indiensname te probeer verbloem in die vorm van ’n vastetermyndienskontrak.

• Dokumentasie
• Ontvang elke werknemer ’n salarisstrokie wat aan arbeidswetgewing voldoen?
• Hou jy ’n teenwoordigheidsregister, asook ’n rekord van alle ure gewerk?
• Vertoon jy die wetgewingplakkate in die werkplek (Wet op Basiese Diensvoorwaardes, Wet op Billike Werksgeleenthede, Wet op Beroepsgesondheid en -veiligheid)?
• Hou jy ’n personeellêer vir elke werknemer met die volgende inligting: werknemer se dienskontrak, verlofvorms, salarisstrokies, dissiplinêre rekord, ID-dokument en persoonlike besonderhede?
• Dissipline in die werkplek
• Het die werkplek ’n relevante dissiplinêre kode wat op datum is en waarvan werknemers bewus is en dit verstaan?

Die dissiplinêre kode dien as riglyn vir werkgewers ten opsigte van die toepaslike sanksie vir spesifieke oortredings.

• Is daar ’n duidelike beleid wat werknemers kan volg met verwysing na die reël(s) ten opsigte van ’n spesifieke onderwerp?

Beleid definieer die werkgewer se eie reëls en moet billik wees. Tipiese beleide sluit in ’n rookbeleid, selfoonbeleid, en higiënebeleid.

• Is daar duidelike prosedures wat werknemers kan volg wanneer ’n spesifieke insident plaasvind?

Tipiese prosedures sluit in ’n appèlprosedure en grieweprosedure.

• Ander
• Betaal jy ten minste die minimumloon?
• Is jy ’n aangewese werkgewer ingevolge die Wet op Billike Werksgeleenthede en voldoen jy aan die toepaslike vereistes?
• Voldoen jy aan die Wet op Beroepsgesondheid en -veiligheid?
• Indien daar ’n vakbond in jou werkplek is, het jy ’n erkenningsooreenkoms in plek?

Om aan arbeidswetgewing te voldoen is nie onderhandelbaar nie en werkgewers loop die risiko van hewige boetes en selfs tronkstraf in gevalle van nie-voldoening. Dit is belangrik dat werkgewers op hoogte bly van toepaslike arbeidswetgewing en daaraan voldoen.