HOOFAKSIES AANGEPAK DEUR DIE MPO NA DIE AFKONDIGING VAN DIE 21-DAE TUISINPERKING

MPO FLITS 1/31 Maart 2020

1. Dr. Chris van Dijk, uitvoerende hoof van die MPO is lid van die Covid-19-taakspan wat die Minister van Landbou, Grondhervorming en Landelike ontwikkeling ondersteun.
2. Die MPO hou in die volgende twee dae vergaderings met van die groot kleinhandelaars om hulle in te lig oor die marksituasie in die primêre suiwelbedryf, om uit te wys dat enige invoere (spesifiek in hierdie tyd) onnodig is, en om te benadruk dat die vraag-elastisiteit van suiwel goed gebruik kan word om vraag te stimuleer en daardeur die verbruiker te help om vitamieninname te verhoog en immuniteit te versterk.
3. Die MPO het ‘n versoek aan Melk SA gemotiveer om die melkvloei-statistiek weekliks aan te vra en beskibaar te stel aan die mark.
4. Die MPO is bewus daarvan dat Lancewood op 30 Maart aangekondig het dat die produsenteprys met ingang 1 April 2020 met 45 sent verlaag gaan word. Dit is nie ‘n Aprilgrappie nie. Die MPO is besig met ‘n reeks aksies om die onnodigheid hiervan uit te wys en te probeer keer. Die MPO-lede sal per skrywes en in die pers ingelig word oor wat hieruit voortvloei. Die aksies het reeds vandag afgeskop.
5. Die MPO is ook besig met ‘n verskeidenheid inisiatiewe om via sosiale media, radio- en TV-onderhoude die voordele van melk-en melkprodukverbruik uit te wys. Melk is propvol noodsaaklike nutriënte wat jou immuniteit versterk en help met die bekamping van virusse, ook as teenvoeter teen die Covid-19-virus. Die MPO-lede word gevra om saam op die sosiale media platforms te woeker deur MPO-suiwelbrokkies te like en share om die digitale voetspoor via Facebook, Twitter en Whatsapp so te vergroot en die boodskap na Jan Publiek uit te dra.
6. Met die tuisinperking is die druk van The Dairy Mail se Mei-uitgawe ook vertraag, maar die Mei-uitgawe sal beslis digitaal beskikbaar wees teen 1 Mei 2020.