OP DIE REGTE PAD MET DIE HOU VAN ’N DISSIPLINÊRE VERHOOR deur Christo Bester

’n Dissiplinêre kode is noodsaaklik om te verseker dat daar duidelike reëls in die werksplek is vir werknemers om te volg. Wanneer hierdie reëls nie nagekom word nie, kan die werkgewer progressiewe dissipline toepas (waarskuwings). In gevalle van ernstige wangedrag kan die werkgewer direk voortgaan met ’n dissiplinêre verhoor. Met die hou van ’n dissiplinêre verhoor word twee dinge verseker: dat ’n billike prosedure gevolg word, en dat daar substantiewe rede is om die werknemer te ontslaan. Die werkgewer moet ook aan die werknemer die geleentheid bied om sy/haar saak te stel en getuies te roep.

STAPPE OM TE VOLG TYDENS ’N DISSIPLINÊRE VERHOOR

Reik ’n kennisgewing aan die werknemer uit om ’n dissiplinêre verhoor by te woon

Die werkgewer moet op die kennisgewing die datum, tyd en plek aandui waar die verhoor sal plaasvind, en die kennisgewing moet ook ’n gedetailleerde beskrywing van die aanklag(te) teen die werknemer bevat, met opgaaf van die datum, tyd en beskrywing van die voorval(le). Ons adviseer werkgewers om die werknemer ten minstens 48 uur kennis te gee van die verhoor, naweke en openbare vakansiedae uitgesluit, om die werknemer toe te laat om voor te berei vir die verhoor.

Hou die verhoor op die voorgestelde datum en tyd

Selfs indien die werknemer nie opdaag vir die verhoor nie, moet die verhoor steeds voortgaan in die werknemer se afwesigheid. Die werkgewer kan voortgaan om bewyse aan die voorsittende beampte voor te lê. Die voorsittende beampte sal bepaal of die werknemer voldoende kennis van die verhoor ontvang het en of die werknemer afwesig is met ’n geldige rede of nie.

Tydens die verhoor sal die voorsittende beampte die werknemer vra om skuldig of onskuldig te pleit op die aanklagte wat teen hom ingebring is

Die werkgewer stel sy saak deur bewyse voor te lê en getuies te roep. Die werknemer word dan toegelaat om sy saak te stel en die bewyse wat deur die werkgewer voorgelê is, te kruisondervra. Daarna kan die werkgewer die bewyse en getuies van die werknemer kruisondervra. Na afloop van die dissiplinêre verhoor sal beide partye slotargumente lewer.

Die voorsittende beampte moet ’n bevinding van skuldig of onskuldig maak

Na afloop van die slotargumente sal die werkgewer gevra word om verswarende faktore voor te lê en die werknemer sal gevra word om versagtende faktore voor te lê. Die voorsittende beampte sal dan die toepaslike sanksie bepaal. Indien die sanksie ontslag is, kan die werknemer met onmiddellike effek ontslaan word.

’n Dissiplinêre verhoor kan formeel of informeel wees, maar dit is baie belangrik dat die werkgewer moet kan bewys dat die verhoor wel gehou is. Daarom adviseer ons dat werkgewers ’n formele verhoor hou, sodat die werkgewer kan verseker dat al die papierwerk in orde is indien die saak verwys word na die Kommissie vir Versoening, Bemiddeling en Arbitrasie (KVBA).