KOSTE VAN KRAGVOER KELDER MARGES IN DIE PRIMÊRE SUIWELBEDRYF

MPO Aanwyser 10/24 Augustus 2020

Die grafiek hieronder illustreer duidelik die styging in die konsentraatgedeelte van die voerkoste (30% soja en 70% geelmielies) vanaf 2018 tot Julie 2020, gebaseer op SAFEX pryse. Die huidige vlak van veral die geelmielieprys word ondersteun deur uitvoerpariteit wat die verwagte effek van die groot mielie-oes neutraliseer. Melkkopers wat verwag het dat die groot mielie-oes goedkoop onverwerkte melk beskikbaar gaan stel, sal dus dringend moet herbesin.

Bron: JSE, Komoditeitsafgeleides, 30% soja’s en 70% geelmielies

Die onderstaande tabel toon die pryse van toekomskontrakte op SAFEX en dit is duidelik dat die huidige pryse vir die toekoms inplek bly en selfs verder styg. Markspelers verwag dus dat beide geelmielie- en sojapryse sterk ondersteuning gaan kry vanaf uitvoerparitiet en dat die pryse hoog gaan bly ten spyte van die groot oes. Onlangse graaninvoere deur China het internasionale pryse gestut en die voorskrif van die Chinese president bekend as die ‘Skoonbord-veldtog’ om voedselvermorsing teen te werk, het internasionale kommoditeitshandelaars die vraag laat vra of voedselsekuriteit in China onder druk is?

Tabel 1: SAFEX geelmielie- en sojakontrakte R/t soos op 21 Augustus 2020

Bron: JSE, Komoditeitsafgeleides

Die hoër graanpryse het dadelik die melk-tot-voerprysverhouding tot 1,3:1 afgedruk wat vir die meeste melkplase beteken dat daar geen marge oorbly nie. Dit gaan onmiddelik die suiwelprodusent se vermoë om optimaal te produseer, voordelige arbeids- en hulpbronbewaringspraktyke toe te pas inhibeer.

Bron: SAFEX en MPO berekening

Opsommend
In die vorige MPO Aanwyser (9) verlede week, is daar volledig ontleed en aangedui dat daar voldoende marges laer af in die waardeketting teenwoordig is om ten minste die huidge produsentepryse te handhaaf. Heelaas is daar reeds melkkopers wat pryse verlaag het en ander wat aangedui het dat pryse einde Augustus gaan verlaag. Teen bogenoemde agtergrond en die feite soos weergegee in MPO Aanwyser 9, is daar eerder gronde vir ʼn prysverhoging en nie -verlaging nie. Die MPO beplan om hierdie week wye samesprekings te voer met melkkopers om die huidige toedrag van sake te bespreek. Die MPO is verbind om die debat rakende pryse in die waardeketting objektief en dinamies te beïnvloed gebaseer op werklike ekonomiese feite en in belang van die hele waardeketting. Ons sal dié benadering uitput voordat ons ander strukture nader.

Bertus van Heerden, hoofekonoom, Melkprodusente-organisasie (MPO)

Laai die MPO Aanwyser 10 24 Aug 2020_Finale pdf hier af